من غير لت وعجن!!!

من غير لت وعجن الفيس بوك..والسفالة وقلة الأدب اللى مغرقة بوستاتة من الجهلة والمتامرين وصيادين المية العكرة..المسألة مش سيسى ومرسى..ولا عسكر واخوان..احنا بعد التعويم وزيادات البنزين والسولار اللى المصريين قبلوها بمرارة بنختلف من أجل مصر..بندور على مصلحتها..ومش بنختلف عليها..الحكومة قالت انها اضطرت لزيادة الاسعار لان التأجيل ماكانش ممكن..وان الزيادة زى ماقال وزير البترول توفر للخزانة 22مليار جنيه ف السنة..وانه ماكانش فى حل تانى ..مع ان الحلول التانية اللى كانت ممكن تبشبش الموازنة العامة للدولة كتيرة أوى..وان حتى قرار الزيادة كان ممكن بشكل تانى يحقق مبلغ أكبر من كده لو فرقت الحكومة بين الغنى والفقير فى الزيادة..لأنه مش من المنطق والعقل ان الاتنين يدفعوا نفس قيمة الزيادة!! فبأى منطق أو عقل ان الحكومة تاخد 75 قرش زيادة على اللتر من اللى راكب 28 تمنها10الاف جنيه ومن اللى راكب عربية تمنها نص مليون جنيه..وبأى منطق أو عقل ان الحكومة تدى البنزين المدعم لمحدود الدخل وتساويه بالسفارات والمدارس والبنوك الاجنبية..وبأى عقل أو منطق الحكومة تساوى فى الزيادة بين الموظف محدود الدخل مهدود الحيل مقطوع النفس وصاحب المكتب والعيادة والوكالة..وبأى عقل أو منطق تعطل الحكومة استخدام الكارت الذكى اللى شايلينه فى جيوبنا زينة بدل ماتحدد حصة مدعومة ل150 لتر كل شهر ويكون الكارت قاصر على المستحقين ..وغير المستحق واللى عاوز زيادة عن الحصة يدفع تمن اللتر من غير دعم..وبأى منطق أو عقل الحكومة تدور على اضافة 22 مليار جنيه للموازنة من ورا زيادة اسعار البنزين والغاز والسولار وسايبة 50 مليار جنيه متأخرات فواتير كهربا بسبب استنطاع المحصلين اللى أغلبهم اخوان عاوزين يوقعوا الدولة..وبأى عقل أومنطق تسيب الدولة 60 مليار جنيه متأخرات ضريبية عند رجال الأعمال..وبأى منطق أو عقل تدفع الحكومة لمستشاريها فوق سن الستين واللى سن المعاش مايعرفهمش 2.5 مليار جنيه فى السنة..وبأى منطق أو عقل تتهاون الحكومة فى تعميم الفواتير على كل أنشطة الاقتصاد غير الرسمى واللى ممكن حسب تقديرات الخبراء تحقق 100 مليار جنيه فى السنة..وأخيرا ..وبرضو من غير لت وعجن ..بأى عقل أو منطق تتعامل الحكومة مع المواطن محدود ومهدود الدخل على انه الحل العاجل ..والهدف الثابت اللى من السهل اصطياده والتنشين عليه..لسة العدالة غايبة..وكلنا مستعدين نستحمل عشان خاطر البلد ..ونشيل احنا الاتنين..بس من غير استعباط..ومن غير ماواحد يغدر بالتانى ..ويقنعه ان ده لمصلحته ..يارب نفهم ونتغير..وبرضو من غير لت ولا عجن!!!