اللواء سيد غنيم يكتب : المؤامرة اليوروأمريكية

4 مايو، 2016 تعليق واحد 2,722 زيارة

راجع كده المؤامرة اليوروأمريكية (الفظيعة) على مصر من حوالي سنتين بس..

أيه اللي يخلى أمريكا تغير إصرارها على تسمية ثورة 30 يونيو (إنقلاب)، لتكون (تغيير)؟

أيه اللي يخلي أمريكا تتراجع عن إيقاف المعونة لمصر وتلغي فقط البند المُخصص للجمعيات الأهلية الداعية للديمقراطية، وضمت مخصصاته لبنود مكافحة الإرهاب والسياحة والصحة والتعليم والبنية التحتية، وطبقاً لما تححده مصر وليس أمريكا، برغم البروقراطية المصرية اللي مأخرة التمويل؟ شوف الدقيقة 7:30 باليوتيوب في الرابط الثاني

أيه اللي يخلي الرئيس الأمريكي ينفذ توصيات محورين من أربع محاور صنع القرار الأمريكي ونصف المحور الثالث لإتخاذ قرارات لدعم مصر والتغاضي عن مشاكل الديمقراطية وهي (الخارجية والبنتاجون وجزء من الكونجرس)، ويتغاضى عن توصيات محور ونصف تقريباً فقط وهما (مستشارة الرئيس للأمن القومي والجزء المتبقي من الكونجرس) اللي مصممين على تفضيل دعم الديمقراطية في مصر ولو بفرض العقوبات عليها عن دعمها ومعاونتها؟

أيه اللي يخلي بريطانيا رغم تقارير انتهاكات حقوق الإنسان المطروح بصفة دائمة عن مصر في برلمانها تقوم من خلال شركة بريتش بتروليوم (BP) بالبدء في تنفيذ استثمارات قيمتها 12 مليار دولار في مشروع دلتا النيل الغربية، الذي أعلن عنه في مارس عام 2015 كأكبر صفقة استثمارية من هذا النوع في تاريخ مصر، وكمان بريطانيا أعلنت جولة جديدة من فرص البحث والعلوم تحت إشراف صندوق نيوتن – مشرفة المصري/ البريطاني بقيمة 24 مليون جنيه إسترليني على مدار خمس سنوات، ده غير مساهمتها في مجالات التعليم والصحة؟

أيه اللي يخلي إيطاليا تشتغل في حقول الغاز الجديدة المكتشفة في مصر رغم إشتعال الجدل وضغط المعارضة الإيطالية على حكومتها علشان قضية ريجيني؟

أيه اللي يخلي الإتحاد الأوروبي وتحديداً دول شمال المتوسط يدخلوا مع مصر في إتفاقيات غاز كبرى، وخلى مصر تبتدي تفتح محطات تسييل الغاز الخام في أراضيها بالإتفاق مع الإتحاد الأوروبي لتصبح دولة منتجة ومصنعة ومصدرة للغاز بدل ما كانت منتجة فقط؟

أيه اللي يخلي برلمان الإتحاد الأوروبي (اللي بيتلكك لنا) وهو صاحب القرارات الملزمة لأعضائه سواء صوتوا عليها بقبولها أو رفضها أو ما صوتوش عليها، وبرغم إصرار لجنة حقوق الإنسان فيه على معاقبة مصر إقتصادياً وعسكرياً بسبب قضية ريجيني وما قدموه للبرلمان قد يشير لإنتهاك حقوق الإنسان في مصر.. أيه اللي يخلي البرلمان رغم كل ده مش بس يرفض إعلان إتهام النظام المصري بناءً على ما وجه له، وبرضو مش بس يرفض توقيع أي عقوبات إقتصادية أو عسكرية على مصر.. بالعكس، ده البرلمان صدق على إستمرار تحويل القروض المُقررة لمصر وآخرها من أيام فقط؟

أيه اللي يخلي الرئيس الفرنسي يجي بنفسه مصر (اللي بتعاني إقتصادياً) في أغسطس 2015 ومرة ثانية من أيام، ويرفض كل محاولات إيقافه عن دعم مصر بسبب إنتهاكاتها حقوق الإنسان اللي المعارضة عنده عمالة تزن على ودانه بيها؟ وأيه اللي يخلي في نفس الوقت نائب المستشارة الألمانية ميركل يجي برضو يزور مصر ويعلن دعمه لها زي فرنسا وإحنا في ظروفنا دي؟

إيه اللي يخلي أمريكا وبريطانيا والأردن (المعترفين بالإخوان المسلمين سياسياً) يبدأوا يضيقوا الخناق عليهم لدرجة مناقشة مقترح تشريع المرشح الرئاسي “تيد كروز” في الكونجرس لحظرها كجماعة إرهابية، وأيه اللي يخلي المجتمع الدولي كله ما يرفضش توصيف دول مجلس التعاون الخليجي للإخوان بالإرهابية مؤخراً؟

أيه اللي يخلي دولة إنقلابية زي مصر العالم كله بيتآمر عليها أن تكون الموافقة العالمية على عضويتها غير الدائمة بمجلس الأمن بإجماع يفوق الـ 92% من التصويت (بغض النظر أنه موعدها الطبيعي والمخطط من سنتين)؟ ومن بعده مجلس السلم والأمن الافريقي في نفس وقت عودتها لعضويه الاتحاد الافريقي اللي كان مجمد عضويتنا لأننا كنا دولة إنقلابية من وجهة نظره؟

أمريكا ودول الإتحاد الأوروبي مش سُذج وعارفة كويس أن لها عدو محدد وهو “روسيا”.. وهناك دول أخرى حطاها في دماغها وهي الصين وكوريا الشمالية وإيران.. وما حدش من الدول دي هيقدر يتحرك بحرية في المنطقة بدون داعم إقليمي قوي، وما فيش أمامهم غير دول الخليج وده (شبه مستحيل) لإختلاف المصالح مع معظمها.. أو مصر وده (ممكن) لإتفاق المصالح مع معظمها.. ناهيك عن أن مصر هي الوحيدة اللي بتحارب الإرهاب جنوب المتوسط بجد ومش هتسكت إلا لما تقضي عليه في سيناء وليبيا.

بقولها لك تاني الناس دي مش سُذج، وربما وجدوا تعارض نسبي بين دوائين، واحد يقضي على الإرهاب اللي طاله في بلاده، والثاني يحقق الديمقراطية اللي عاوزينها، والضرورات تبيح المحظورات.

والرئيس المصري برضه مش ساذج وبيتحرك ويحط رجله بقوة، والدليل كل ما سبق.

بقلم : ســـيد غنـيم

زميل أكاديمية ناصر العسكرية العليا

إستشاري الأمن القومي والدفاع

www.sayedghoneim.net

رابط تقرير المعونة الأمريكية لمصر الصادر من الكونجرس فبراير 2016:

https://www.fas.org/sgp/crs/mideast/RL33003.pdf

رابط فيديو تصريحات بايج إليكسندر (مترجم) مساعد مدير المعونة الأمريكية USAID للشرق الأوسط بشأن المعونة الأمريكية لمصر وتعديلاتها منذ سنتين ونصف:

https://www.youtube.com/watch?v=uekFK5fUoIQ

رابط الخبر بجريدة الشروق:

http://www.shorouknews.com/news/view.aspx?cdate=24042016&id=360748aa-f274-4f20-8be2-768fc2e06b95

رابط الموقع الرسمي للحكومة البريطانية بشأن استثمار شركة بريتش بتروليوم (BP) البالغ 12 مليار دولار في مشروع دلتا النيل الغربية: