السبت, 25 سبتمبر , 2021 8:54 ص
الرئيسية / مقالات / حبيبك يبلعلك الزلط والإعلام فى حاجه غلط

حبيبك يبلعلك الزلط والإعلام فى حاجه غلط

حدث بالفعل صحيت من النوم لاقيت حد باعت لي علي الفيس بوك فيديو قصير منشور على أحد المواقع الإلكترونيه لصحيفه معروفه وموقعها من المواقع المتميزه وليها متابعين كتير شغلت الفيديو اللي كان بيحمل تساؤل ليه  من مرسله …. ايه ده ؟؟

شغلت الفيديو ودمي واتحرق ليه نصدر المناظر السخيفه دي علي وسائل التواصل الاجتماعي  اللي اكيد بيشوفها العالم كله مش احنا بس

ومن سخريه الاقدار ان قبلها بيوم لاقيت علي موقع لجريده تانيه خبر عن إحياء عمرو دياب لحفلة في احد الجامعات الخاصه  وماله مبروك … بس الصحفي الهمام  واضح انه للاسف يا ترجم بالكاد  العنوان المكتوب فوق صورة عمرو دياب  ونقشه من علي موقع خاص بطلبه تلك الجامعه عشان يعمل انفراد وخبر دون أن يعرف حقيقه تفاصيل العنوان أو انه متعبش نفسه و كمل قراءة التعليقات حول العنوان  لأنه لو كمل قرايه  كان هيعرف أنه مجرد بوست ساخر بيحاول من خلاله الطلبه  يعبروا لادارة الجامعه بطريقه غير تقليديه عن  عدم رضاهم عن أسماء الفنانين المطروحه  لإحياء الحفله   وبيقولوا يا سلام لو اتقلب العنوان لحقيقه وجه عمرو دياب

وطبعا القصه هنا مش الحفله ولا الجامعه ولا عمرو دياب المصيبه ان ده بيحصل في حاجات كتيرر للاسف نقل عناوين من علي صفحات الفيس وتحويلها الأخبار دون التحقق ولا التدقيق وازاى يا ساده اخلي الفيس بوك مرجع مصدق مع انه ممكن يكون مليان صفحات مزيفه باسماء وهميه ..

يبقي اقل واجب وأبسط القواعد الإعلامية لو حبيت اكتب خبر لازم أتاكد منه ولو اللغه عائق اجيب اي مصدر واسال مش عيب بس العيب انا اكتب اي حاجه عشان اسبق وبس

سيبنا بقه من الحفلة الوهميه ويلا نرجع للفيديو  اللطيف اللي صاحبه حابب يوصل رساله معينه مركز علي اضيق كادر مجموعه من المواطنين ممدودي الايدي لتريلا بابها مقفول وعلي الحافه يقف جنود يوزعون السلع للمواطنين

بس لو كررت الفيديو زي ما انا عملت هتلمح ان في جنود تانيين في  وسط الناس بس يا تري ليه بيساعدوا زمايلهم فى التوزيع بيحاولوا ينظموا الناس  او بيتاكدوا ان كل واحد ياخد كرتونه واحده بس االله واعلم بس اللي واضح ان صاحبنا اللي صور محبش يبين المشهد كامل حابب يصور اللقطه دي بس عشان يوصل رسالته  المزيفه وطبعا كل واحد وافق هواه المشهد اخده وكتب عليه كام كلمه عشان يزود حبة بهارات ويقوم بالواجب

وكأن حضرته او حضرتها من بنها ………

يا ساده يا كرام حد يجيب  لي صورة او فيديومن

  • بوفيه فرح فى اوتيل 7 نجوم عشان نشوف الايليت وهما ماشين في كل الاتجاهات دون التزام باتجاه ترتيب البوفيه وده غير تدمير البوفيه في ثواني ويا ريت الاكل بيتاكل لكن للاسف بيتجمع من علي الترابيزات ويكون مصيرة الزباله
  • طب اي هايبر عند الكاشير كام مره شوفت خناقه مع بني ادميين عشان عدم احترام الطابور
  • طب بلاش كل ده كام مره كنت واقف علي اسانسير وانشقت الأرض عن ذلك الكائن الذي يعتبر الطابور هوا ويدخل اول واحد
  • طب مشهد اخير بكاميراتك الرائعه لكتله من الناس بتتدافع وتقف تقول يا تري في ايه ويطلع ورقه مجردورقة دعايه في معرض

دي نماذج لناس عايشه معانا مش اختراع

فما بالك في ازمه غلاء اسعار واحتكار ونقص في السلع وعربيه بتوزع السلع دي باسعارمخفضه  تخيلوا حضراتكم المشهد    الحمد لله انه تزاحم وبس

إحنا أمام  ثقافه وده اللي يزعل يا ساده  ….  فبلاش نعمل نفسنا مندهشين ومستغربين ونتجاهل ان في حاجه غلط

لأن الحقيقه والواقع واحده  يا ساده  وبدل ما انت شاغل نفسك بالتكسير حاول تفكر ازاى ممكن تساعد تغيير الثقافه السلبيه دي

اما الاخوه اللي عاملين نفسهم صحفيين وهما لا يمتوا للصحافه بصله الغلط مش عليهم الغلط

علي اللي اداهم الفرصه للعمل والنشر علي المواقع الالكترونيه دون خبرة ولا تخصص عشان  كل همه يوفر في النفقات ويزود عدد الزيارات  علي الموقع

احنا مش محتاجين الإعلام ده

احنا محتاجين اعلام ينور

اعلام ينقل الحقيقه

ولا يصطنعها

واذا ما انتبهناش لده

يبقي اكيد فى حاجه غلط